[texts](languages) [eddic](eddic-poetry) # Grímnismál [[sayers2016]] Hrauðungr konugr átti tvá sonu. Hét annarr Agnarr en annarr Geirrøðr. Agnarr var tíu vetra, en Geirrøðr átta vetra. Þeir reru tveir á báti með dorgar sínar at smáfiski; vindr rak þá í haf út. Í náttmyrkri brutu þeir við land ok gengo upp, fundo kotbónda einn; Þar váru þeir um vetrinn. Kerling fóstraði Agnar, en karl Geirrøð. At vári fekk karl þeim skip, en er þau kerling leiddu þá til strandar, þá mælti karl einmæli við Geirrøð. Þeir fengu byr, ok kómu til stǫðva fǫður síns. Geirrøðr var fram í skipi. Hann hljóp upp á land, en hratt út skipinu ok mælti: "Farðu þar er smyl hafi þik!" Skipit rak út, en Geirrøðr gekk út til bǿjar. Honum var vel fagnat; þá var faðir hans andaðr. Var þá Geirrøðr til konungs tekinn ok varð maðr ágætr.